കല്‍പ്പറ്റ: ഭര്‍തൃവീട്ടില്‍ മന്ത്രവാദ പീഡനത്തിന് ഇരയായ വാളാട് സ്വദേശിനിയായ യുവതിയെ സംസ്ഥാന വനിത കമ്മീഷന്‍ നേരില്‍ കണ്ട് വിവരങ്ങള്‍ ചോദിച്ചറിഞ്ഞു.
സാസ്‌കാരിക കേരളത്തിന് യോജിക്കാത്ത പ്രവണതയാണ് ഇന്ന് നടക്കുന്നതെന്നും ഇനിയും ഇത്തരം സംഭവങ്ങള്‍ ആവര്‍ത്തിച്ചുകൂടെന്നും അദ്ധ്യക്ഷ പി. സതീദേവി പറഞ്ഞു. കേസന്വേഷണത്തിന്റെ പുരോഗതിയും അദ്ധ്യക്ഷ വിലയിരുത്തി. സംഭവത്തില്‍ വനിതാ കമ്മീഷന്‍ സ്വമേധയാ കേസെടുത്തിരുന്നു. യുവതിയുടെ തുടര്‍പഠനത്തിന് ആവശ്യമായ നടപടികള്‍ സ്വീകരിക്കാന്‍ സ്ഥലം എം.എല്‍.എയോട് ആലോചിച്ച് നടപടികള്‍ സ്വീകരിക്കുമെന്നും കമ്മീഷന്‍ ഉറപ്പുനല്‍കി.
വീല്‍ചെയറിലിരുന്ന് അതിജീവന പോരാട്ടത്തിലൂടെ സിവില്‍ സര്‍വീസ് പരീക്ഷയില്‍ മികച്ച വിജയം കരസ്ഥമാക്കിയ കമ്പളക്കാട് സ്വദേശിനി ഷെറിന്‍ ഷഹാനയെയും കമ്മീഷന്‍ അദ്ധ്യക്ഷ പി. സതീദേവി സന്ദര്‍ശിച്ചു. വനിത കമ്മീഷന്‍ അംഗം അഡ്വ. പി കുഞ്ഞായിഷ, വാര്‍ഡ് മെമ്പര്‍, വിവിധ വകുപ്പ് ജീവനക്കാര്‍ തുടങ്ങിയവര്‍ വനിതാ കമ്മീഷന്‍ അദ്ധ്യക്ഷയോടൊപ്പമുണ്ടായിരുന്നു.