കാവുംമന്ദം: തരിയോട് ഗ്രാമപഞ്ചായത്തിന്റെ ക്ലീന്‍ തരിയോട് പദ്ധതിയോട് സഹകരിച്ചുകൊണ്ട് താന്നിക്കാമൂല സ്വാശ്രയ സംഘം പ്രവര്‍ത്തകര്‍ എടത്തറകടവ് പാലവും കാവുംമന്ദം ടൗണ്‍ വരെയുള്ള ഒരു കിലോമീറ്റര്‍ ദൂരത്തിലുള്ള റോഡിന് ഇരുവശത്തെയും കാടുകള്‍ വെട്ടിയും മാലിന്യം ശേഖരിച്ചും വൃത്തിയാക്കി. സംഘത്തിന്റെ 22-ാം വാര്‍ഷികത്തോടനുബന്ധിച്ച് നടത്തിയ ശുചീകരണ പരിപാടി തരിയോട് ഗ്രാമപഞ്ചായത്ത് പ്രസിഡന്റ് ഷമീം പാറക്കണ്ടി ഉദ്ഘാടനം ചെയ്തു.
സംഘം പ്രസിഡന്റ് ബെന്നി മോളോപറമ്പില്‍ അധ്യക്ഷത വഹിച്ചു. പാലത്തിനും റോഡിന്റെ ഇരുവശവും വാഹനങ്ങള്‍ക്ക് കാഴ്ച മറക്കുന്ന രൂപത്തിലുള്ള കാടുകളാണ് ഈ പ്രവര്‍ത്തിയിലൂടെ വെട്ടി മാറ്റിയത്. സെക്രട്ടറി ബേബി വെള്ളാരംകാലായില്‍, ജോസ് ഇടയാടിയില്‍, വില്ലി വെള്ളാരംകാലയില്‍, ബെന്നി വെള്ളാരംകാലയില്‍, ജോണി കടുത്താംതൊട്ടിയില്‍, പി.യു. ജോസഫ്, ജോണ്‍സണ്‍ മഠത്തില്‍ തുടങ്ങിയവര്‍ നേതൃത്വം നല്‍കി.