വൈത്തിരി: മാലിന്യമുക്തം നവകേരളം ക്യാമ്പയിനിന്റെ ഭാഗമായി കേരള ഖരമാലിന്യ പരിപാലന പദ്ധതി (കെ.എസ്.ഡബ്‌ള്യൂ.എം.പി) നഗരസഭ പ്രതിനിധികള്‍ക്കായി വൈത്തിരിയില്‍ സംഘടിപ്പിച്ച ‘മാറ്റം’ ദ്വിദിന ശില്‍പ്പശാല സമാപിച്ചു. ഖരമാലിന്യ പരിപാലനത്തില്‍ നിലവിലുള്ള സാഹചര്യം, നേട്ടങ്ങള്‍, വെല്ലുവിളികള്‍, പദ്ധതികളുടെ രൂപകല്‍പ്പന, മാതൃകകള്‍ തുടങ്ങിയ വിഷയങ്ങളില്‍ വിദഗ്ധരുടെ ക്ലാസുകളും ഗ്രൂപ്പ് ചര്‍ച്ചകളുമാണ് ശില്‍പ്പശാലയില്‍ നടന്നത്. ഓരോ നഗരസഭകളും അവരുടെ നിലവിലെ ഖരമാലിന്യ പരിപാലനത്തിലെ അപാകതകളും പുതിയ പദ്ധതികളും അവതരിപ്പിച്ചു. ശില്‍പശാലയില്‍ മാലിന്യ പരിപാലനത്തില്‍ സുസ്ഥിര നേട്ടം കൈവരിക്കുന്നതിന് ഓരോ നഗരസഭകളിലും നടപ്പാക്കേണ്ട മാസ്റ്റര്‍പ്ലാനും ചര്‍ച്ചാവിഷയമായി. കോഴിക്കോട്, വയനാട്, കണ്ണൂര്‍, കാസര്‍ഗോഡ് ജില്ലകളിലെ നഗരസഭാ പ്രതിനിധികളുടെ ശില്‍പ്പശലയാണ് നടന്നത്. നാല് ജില്ലകളില്‍നിന്നായി 25 നഗരസഭകളുടെ പ്രതിനിധികളാണ് ശില്‍്പ്പശാലയില്‍ പങ്കെടുത്തത്.
