തിരുവനന്തപുരം : ദുരിതാശ്വാസ തുക അക്കൗണ്ടിൽ എത്തിയപ്പോൾ ഇഎംഐ പിടിച്ചതിന്റെ ഞെട്ടലിൽ നിൽക്കുന്ന മിനിമോൾക്ക് സഹായ ഹസ്തം നീട്ടി പ്രവാസി മലയാളി. ദുരിതം തച്ചുടച്ച പുഞ്ചിരിമട്ടം സ്വദേശി മിനിമോളുടെ 50,000 രൂപയുടെ വായ്പാ ബാധ്യത ഏറ്റെടുക്കുമെന്ന് കാസർകോട് സ്വദേശിയായ അനിൽ പൊതുവാൾ അറിയിച്ചു. ദുബായിൽ ജോലി ചെയ്യുന്ന അനിൽ വാർത്തകളിലൂടെ മിനിമോളുടെ ദുരിതമറിഞ്ഞാണ് സഹായം ചെയ്യാമെന്ന് അറിയിച്ചത്.
വീട് വെക്കാൻ വേണ്ടിയാണ് മിനിമോൾ ഗ്രാമീണ ബാങ്കിൽ നിന്ന് 50,000 രൂപ വായ്പയെടുത്തത്. എന്നാൽ വീടും പ്രദേശങ്ങളുമടക്കം ഉരുൾ എടുത്തതോടെ ജീവിക്കാൻ പോലും മാർഗമില്ലാതായി. അതിനിടെയാണ് പഞ്ചായത്തിൽ നിന്നും സർക്കാരിൽ നിന്നും ലഭിച്ച സഹായം ധനം അക്കൗണ്ടിലേക്ക് വന്നത്. പിന്നാലെ ഗ്രാമീൺ ബാങ്ക് ഇഎംഐ തുക അക്കൗണ്ടിൽ നിന്നും പിടിക്കുകയായിരുന്നു. ഭക്ഷണം വാങ്ങാനായും സാധനങ്ങൾ വാങ്ങാനായും വെച്ച പണമാണ് അക്കൗണ്ടിൽ നിന്നും ബാങ്ക് പിടിച്ചത്. വാർത്തകളിലൂടെ വിവരം പുറത്ത് വന്നതിന് പിന്നാലെയാണ് സുമനസുകളുടെ സഹായം.